Col 3 | EMI | STEP | Nau am ghe totula tale ouna ateva maulue, am ghe totu eitaua teela Karisto, me am tani pae voto ngepona liu, nongina Karisto etokatoka tale pai muenna atelange ta God

Colossians 3

Am toka tale ouna ateva maulue

1 Nau am ghe totula tale ouna ateva maulue, am ghe totu eitaua teela Karisto, me am tani pae voto ngepona liu, nongina Karisto etokatoka tale pai muenna atelange ta God 2 me am atoka nannaaimim tale voto ngepona liu me karika tale kosa ateva. 3 Tale lo ateva oia maulue angam ghe matela etana, me maamauluaaimim tuunga ateva eaisulia ta Karisto elome ta God. 4 Karisto etautau aatu maulue ateva. Me nau eteva ekaurekati tale ia akapa kosa ateva, aue eapasunga sarasarakaniaane me mallangina, am tee aue am lao aitaua teeia me aue la tara akapaiem me maamauluaaimim aue toka tee Iesu, karika aue eaisulia me aue am toka tale mallangina ateva.

5 Liuna avalua o me am ghelei emate sesa ninanna me sesa voto tale kosa ateva oia: uungua niaso tee vause me taita karika lailai, karika am mene kune taita me vause, me am rau mene ghelei llo voto sesa taumattu ngatoa la paapalata, me aloaloanaimim korokoronganaaili tani kune vause me taita tani ghelei ssavoto, me nikuruetu, nim nongina va am kakkaua tootoo. 6 Poli isaa o ase voto, sessaiaane God ange mae sio. ^{▼▼3:6 ange mae sioKasina uru ngai laghe pitila, laghe pitilaange mae sio ta lo atoa la saasakeainia.} 7 Me am, am ghe kasukasu tale llo akasina maamauluaaimim am ghe tokatoka etana. 8 Me isaa oia, am ghaa velu etaimim isaa o asease voto nongina nisessai, me nianna saasakia ta kateva, me nitam aloana kateva, me niasake, me inangari nilakolako ta paaimim. 9 Karika am mene aikamea, nau eteva am ghe ghaa vella uunguaimim pei ngarau am ghe gheeghelei 10 me am ghe mene tiuaa ngaounala nau God ghe mene ghelei eounaiemla tale tootoona ateva lo ateva ghe gheleitala, tani ghelei va am tani kila alomasaanganiaane. 11 Tale ouna ateva maulue karika toa aJiu me karika toa aGrik, me karika toa isoiso me lo atoa karika isoiso ila, me lo atoa karika va aJiu ila me aGrik ila, me lo atoa karika alomasaanga ila, me lo atoa karika la rooroo tani ghelei voto tale nim nannaaira, me lo atoa la rooroo tani ghelei nongina la aloana tani ghelei, ta Karisto ie nonga akapa etaira.

12 Nongina God ange suitoongainamla va am manga am, me eailousiangailiem, am amolumoluem tale isaa o niuungu: am aisausia lo atoa karika righi peiira, me niaisausi etani mae tale urunguitaniimim, me am sioa nannaaimim ta katoa, me am nnaa mene kateva, me karika emene sessai parasiem ta mene kateva. 13 Arova ange gheleila voto ateva masina ia me karika ange mae sio ta nannaam, unim sioaa nannaam me lao aitaua teeia, me arova kateva eghelei saasakia, am kalueinia, nongina Vau eteva ghe kaluaala kaluimim maamatana. 14 Me tale llo voto matuutuliena, am ailousia ngakoronna me aue am toka amasina tee mene kateva. 15 Am tau velu kanna luei eteva Karisto emuemua tale urunguitaniimim, nongina ghe koloamla tani kateva nonga, me am kaili emasina. 16 Am tau velu inangarina ateva Karisto etoka elome etaimim me eapasunga ta kateva kateva alomasaanga tani kinari tau sae emaemae ta Spiriti eteva, me kinari tee nimasimasi tani tau sae God tale urunguitaniimim. 17 Me saa llo am ghelei tale inangari me niuungu, am ghelei llo voto tale ararina ateae Vau eteva Iesu, tani kaili emasina ta God Tamaita ia.

Inangari niloeloe tale kateva kateva tau ngaiesoa

18 Vause atoa am atoka nannaimim ta taitaniimim atoa ta isaa o voto ghulughuluena ta Vau eteva. 19 Taita atoa lailai iem am aielousia vausenimm atoa karika am mene soriena teeila. 20 Aliki etoa am nongo usila tamaimim me kinaimim atoa tale isaa akapa voto, poli isaa o voto eaamasimasi Vau eteva. 21 Tamatama atoa am rau mene savalaa natuimim atoa va esessaila, erau ghelei nannaaira va esioaaili euu. 22 Lo atoa am uungu me karika am tokatoka tale aloaloanaaimim, am nongo usila vauimim atoa tale kosa ateva oia tale voto akapa. Karika am uungu nonga ta nau eteva la aitarainam va am ghelei emasimasila, ta am uungu tale masi ninanna emaemae tale urunguitaniimim, me tani oneonea God. 23 Saa niuungu am gheeghelei, am ghelei tale masi ninanna emaemae tale urunguitaniimim ateva, nongina va am uungu ta Vau ngepona ateva, me karika va ta taumattu ngatoa. 24 Am uungu emasina poli am kilakila va ta Vau eteva aue am ghaa voto masina ghe aulia ngalokoila, nongina aipolipoli. Am uungu ta Vau eteva Karisto. 25 Tau ngai ghelei ssavoto atoa aue la ghaa aipolipoli tale llo voto sesa laghe gheleila. Karika aue righi niaimassia.